कम्युनिष्ट पार्टी विरुद्ध वोल्नुपर्ने वेला आयो – देउवा
२०७७ फागुन २९ गते, काठमाण्डौं ।
नेपाली कांग्रेसका सभापति शेरबहादुर देउवाले कम्युनिष्ट पार्टीको विरूद्धमा लड्नुपर्ने बेला भएको बताउनुभएको छ ।
शनिबार नेपाली कांग्रेसको केन्द्रीय महिला विभागले आयोजना गरेको महिला भेला तथा प्रशिक्षण कार्यक्रमलाई सम्बोधन गर्दै सभापति देउवाले कम्युनिष्ट पार्टीले एकदलीय सर्वसत्तावाद लागू गर्न चाहेका कारण प्रजातन्त्रलाई स्थायी बनाउनका लागि कम्युनिष्ट पार्टीको खिलापमा लड्नुपर्ने बेला आएको बताएका हो ।
कम्युनिष्टहरु प्रजातन्त्रको खिलापमा रहेको भन्दै सभापति देउवाले नेपालमा कसैले हटाउन नसक्ने स्थायी प्रजातन्त्र स्थापना गर्नुपर्ने बताउनुभयो । ‘प्रजातन्त्र सबैभन्दा महत्वपूर्ण कुरा हो अहिले । अहिले ओली सरकारको कस्तो प्रजातान्त्रिक संस्कार नभएको पार्टी । कम्युनिष्ट एकदलीय सर्वसत्तावाद लागू गर्न चाहान्छ । झुठा नारा दिएर, जनतालाई बहकाएर, महिलाहरुलाई बहकाएर आफू सत्तामा बसिरहने कुरा हो। हाम्रो पार्टीले प्रजातन्त्रलाई स्थायी गराउनु आवश्यक छ। स्थायी गराउन, कसैले प्रजातन्त्रमाथि आक्रमण गर्न नसकोस’, उहाँले भन्नुभयो, ‘सात सालमा राणाको खिलापमा प्रजातन्त्रका लागि लडेका हौँ हामीले । पञ्चायतको खिलापमा प्रजातन्त्रकै लागि लडेका हौं । अहिले पनि कम्युनिष्टको खिलापमा प्रजातन्त्रकै लागि लड्नुुपर्ने बेला भएको छ । प्रजातन्त्रको खिलापमा उनीहरु छन् तर हामीले स्थायी प्रजातन्त्र, कसैले हटाउन नसक्ने प्रजातन्त्र स्थापना गर्नुछ नेपालमा । त्यसका लागि एउटा मात्रै पार्टी छ नेपालमा, नेपाली कांग्रेस पार्टी छ। अरु प्रजातन्त्रवादी पार्टी नै होइनन् ।’
कार्यक्रममा सभापति देउवाले देशको राजनीति अत्यन्तै तरल अवस्थामा रहेको पनि बताउनुभयो । नेपाली कांग्रेसले लोभ र हतार गर्नुनहुने भन्दै उनले परिस्थिति आइप¥यो भने जिम्मेबारीबाट नभाग्ने पनि स्पष्ट पार्नुभयो । ‘नेपालको राजनीति अत्यन्तै तरल अवस्थामा छ । हाम्रो पार्टीले धेरै हतार गर्ने लोभ गर्ने काम पनि छैन । र परिस्थिति प¥यो भने जिम्मेवारीबाट भाग्ने काम पनि छैन,’ उहाँले भन्नुभयो ।
सभापति देउवाले नेपाली कांग्रेस पार्टी भित्र महिलालाई ३३ प्रतिशत आरक्षणको व्यवस्था गरेको बताउनुभयो । महिलालाई पार्टीमा आकर्षित नगराए पार्टीको जित नहुने उहाँको भनाई छ । ‘हाम्रो पार्टीले महिला दिदीबहिनीलाई पनि नेपालको संविधान अनुरुप बराबर नै ३३ प्रतिशत महिलालाई हाम्रो पार्टीमा पनि आरक्षण गरेका छौँ’, उहाँले भन्नुभयो, ‘महिलाहरुलाई पार्टीमा जबसम्म आकर्षित गर्न सकिदैन, तबसम्म पार्टीको जित कहिल्यै हुँदैन । महिला शक्ति हो। जिताउन सक्छ महिलाहरुले, हराउन पनि सक्छ। महिलालाई जस्तो अधिकार देशले दिएको छ त्यो अधिकार कांग्रेसले पनि दिएको छ । महिला मतदातालाई हाम्रो पार्टीमा आकर्षित बढी गराउनुप¥यो।’
